Ho Dah Kan si? (H)

1. Pathian muisam ngei leh Khawruahhar thiltha tuah dingih ser kan si:

(Gen 1:27) Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna.

(John 10:34-35) 34 Jesuh nih a leh hna i, “Nan phungbia chungah, ‘Pathian nih, “Nannih cu pathian nan si,” kan ti hna,’ a ti, tiah aa ṭial lo mei? 35 Pathian nih a bia a pekmi minung hna kha pathian ti an si ahcun — Cathiang cu a palh ti khawh a si lo va si kaw —

(Psalm 139:14,16)14 Hi bantuk thil thuk le khuaruahharmi thil ruangah hin nangmah cu kan lawmh: keimah kong i khuaruahhar a simi thil le nangmah nih na tuahmi thil khuaruahhar a simi hna kong ah hin kan lawmh. 16 Ka chuah hlan in na rak ka hmuh diam cang. Ka ca i na sermi ni hna cu na cauk chungah an rak i khumh diam cang, hram an i thawk hlan hmanh khan an i ṭial diam cang.

(Jer 1:5)“Paw chung i kan ser hlanah kan hngalh i na chuah hlanah kan thianter cang; Nangmah cu miphun hna ca i profet ah kan chiah cang,” tiah a ti.

(Eph 2:10) Kannih cu Pathian kutchuak kan si i Pathian nih thil ṭha tuah dingah a rak kan tinh bantukin Khrih he kan i pehtlaihnak thawngin thil ṭha cu kan tuah khawhnak hnga a kan ser ṭhanmi kan si.

2. Pathianthu tello cun leidip men kan si:

(Gen 2:7) Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung.

(Gen 3:19) Rawl na hmuh khawhnak dingah, vawlei i na kir ṭhan hlan tiang, thlan hripi puak in na cawl a hau lai; Nangmah cu, cu vawlei cun sermi na si. Leidip na si i leidip ah na kir ṭhan lai.

(Gen 3:3-4) 3 dum chung i a ummi thingthei vialte hi azeipaoh kan ei khawh ko hna,” tiah a leh. “Pathian nih khi thing khi cu a tlai nan ei lai lo, a tongh zong nan tawng lai lo, nan tongh ahcun nan thi lai, a kan ti,” tiah a ti. 4 Rul nih cun, “Cucu ahmaan lo; nan thi lai lo.

(James 3:17) Sihmanhsehlaw cunglei in a rami fimnak cu a hmasa bik ah a thiang i cun daite le nem tein a um i hawikom cungah a ṭha; midang zaangfahnak khan a khat i thil ṭha kha tampi a tlai; thleidannak zeihmanh a ngei lo i a zer zong a zer lo.

(Deu 28:1) 1 “ Bawipa nan Pathian aw kha nan ngaih i nihin ah kan pekmi hna nawlbia vialte cu ṭha tein nan tuah ahcun, vawleicung miphun vialte hna cungpi ah khin Bawipa nan Pathian nih an chiah hna lai.

(Rom 10:17) Cucaah zumhnak cu bia theihnak thawng khan a um i bia cu Khrih kong chimnak thawng khan a um.

(James 1:5) Sihmanhsehlaw fimnak a baumi nan um ahcun, Pathian sinah thlacam seh law Pathian nih a pek ko lai; Pathian nih cun ahopaoh kha zaangfah ngai le siang ngaiin a pek ko hna.

(James 4:10) Bawipa hmaiah toidor tein um u law amah nih an hlorh hna lai.

(John 1:11) Amah ram a simi ah khan a ra nain, amah mi ciacia nih khan an rak cohlang duh lo.

(Hos 4:6) Ka mi hna nih keimah cu an ka hngalh duh lo (hngalhnak tlawm) caah an rawk. Nannih tlangbawi hna nih keimah hngalh kha nan duh ve lo i ka cawnpiaknak kha nan hlawt, Cucaah nanmah le nan fapale hna cu ka tlangbawi sinak khan kan hlawt hna.

(Exo 20:1-20)

• 1 Pathian nih hi bia vialte hi a chim hna.
• 2 Aa thawh i, “Sal i nan cannak inn chung, Izipt ram chungin an chuahtu hna cu Bawipa nan Pathian hi ka si.
• 3 “Keimah hlei in pathian dang zeihmanh nan bia lai lo.
• 4 “Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa lo in siasal zeihmanh nan i ser lai lo.
• 5 Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi Bawipa nan Pathian cu ka si i nahchuah a ngeimi Pathian ka si. A ka huatu cungah cun chan thum chan li tiangin an tefa hna cungah khan dantatnak ka tlunter.
• 6 Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter.
• 7 “Bawipa nan Pathian min cu ningcang loin hmang hlah u, ningcang loin ka min a hmangmi cu dan ka tat hna lai.
• 8 “Sabbath ni kha philh hlah u, Bawipa caah va hmang u.
• 9 Nan rian vialte kha ni ruk chung nan ṭuan lai,
• 10 sihmanhsehlaw ni sarih ni cu dinh ni a si i Pathian caah nan hman lai. Cu ni ah cun ahohmanh rian nan ṭuan lai lo, nanmah siseh, nan fale si hna seh, nan sal si hna seh, nan saṭil si hna seh, nan khua chung i a ummi miphun dang si hna seh, ahohmanh rian nan ṭuan lai lo.
• 11 Ni ruk chungah Bawipa nih van le vawlei le rili le an chung i a ummi thil vialte kha a ser hna i ni sarih ni ah cun aa din. Cucaah cun Bawipa nih dinh ni cu thluachuah a pek i amah ca rian ṭuannak caah a duh.
• 12 “Nan nu le nan pa kha upat hna u, cu ti nan tuah ahcun, Bawipa nan Pathian nih an pekmi hna ram ah hin saupi nan um lai.
• 13 “Lai nan nawng lai lo.
• 14 “Va cung pa duh siseh, nupi cung nu duh siseh, nan tuah lai lo.
• 15 “Nan fir lai lo.
• 16 “Nan minung hawi cungah tehte dinglo nan si lai lo.
• 17 “Nan innpa inn kha nan mit a thi lai lo. A nupi siseh, a salpa siseh, a salnu siseh, a cawtum siseh, a laa siseh, a ngeihmi thil paohpaoh si hna seh, nan mit a thi lai lo,” a ti.
• 18 Mi zapi nih khan khuari thawng le tuukawng ki muko aw thawng kha an theih i nimtlau le tlang cung meikhu kha an hmuh hna tikah, a ther in an ther i lamhlat piin an dir.
• 19 Moses kha an thawh i, “Nangmah nih bia cu kan chim ko, na chimmi cu kan ngaih ko lai, sihmanhsehlaw Pathian nih a kan chimh ahcun kan thi lai,” an ti.
• 20 Moses nih mi zapi cu, “Nan thinphang hlah u; Pathian a rat cu nanmah hneksak awk le sualnak nan tuah nakhnga lo amah nan a ṭih zungzal nakhnga ca lawngah a si,” a ti.

(Matt 5:17) “Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra.

3. Minung thinlung le ruahnak bochhan hi chiatserh nak asi

(Gen 6:5-6) 5 Bawipa nih minung cu khuazakip ah an ṭhat lo tuk hringhran le an lungchung cu ruahnak ṭhalo lawnglawng a khah kha a hmuh tikah, 6 minung a rak ser hna i vawlei cung i a rak umter hna kha a ngaih a chia. Aa ngaichih i,

(Eze 18:4) A nungmi paoh cu keimah ta an si dih, an hringtu nu le pa si hna seh, an fale si hna seh, an dihlak in ka ta an si. A sualmi paoh cu a thi ko lai.

(Jer 17:5) “Minung kha a bochan i minung kha aa hngatchanmi ah aa serh i Bawipa kha a mertakmi cu a cungah chiat tlung ko seh!

(Jer 17:9) Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiangin a zaw cang.

(Ps 51:5) Sual cia in hrin ka si, ka nu nih a ka pawi ah khan, misual ka si cang.

(Gal 5:19-21) 19 Minung sining nih a tuah tawnmi cu a fiang ko: nu le pa sualnak tehna, a thurhnawmmi thil tehna, aa dawhcah lomi thil tehna, 20 siasal biak tehna le dawih le eih tehna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat, an i ṭhen, 21 ziar an i ngeih, zu an ri, an au an khuang i cu bantuk thil a dang tampi kha an tuah lengmang hna. … cu bantuk thil a tuahmi cu Pathian Pennak an hmu lai lo.

(Pro 4:23) Na lung kha ṭha tein veng tuah, Zeicahtiah cuka cun nunnak cerhti kha a put.

(Pro 13:20) Mifim hna sinah i chawk ve lengmang law na fim lai, mihrut hna he i kom law a ping ah an in hruai lai.

(Rom 8:13) Nan mihring sining in nan nun ahcun nan thi ko lai; sihmanhsehlaw sualnak nan tuahmi kha Thlarau in nan thah ahcun nan nung lai.

(James 4:7) Cucaah Pathian nawl kha ngai ko u. Khuachia kha doh u law an zam tak ko hna lai.

(Jer 8:9) Nan mifim hna cu ningzahnak an phan, An lung aa tuai i chikkhatte ah khulrang tein thil hngalh khawhnak fimnak an ngeihmi kha an thlau cang. Bawipa bia cu zei ah an rel ti lo, An fimnak cu zei bantuk fimnak dah a si?

4. Pathian cu taksa in a ra, A kan dawt ruangah asi

(Isa 9:6) Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Khuaruahhar Fim Chimtu, A Ṭhawngmi Pathian, Zungzal Hmunmi Pa, Daihnak Bawi, ti a si lai.

(1 Tim 3:16) Kan biaknak phung chung i aa thupmi biathli hi zeitluk in dah a ngan ti kha ahohmanh nih an al kho lo: Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai.

(John 1:1,14) 1 Vawlei hi ser a rak si hlanah Bia cu a rak um cang; cu Bia cu Pathian sinah a rak um i cu Bia cu Pathian a si. 14 Bia cu minung ah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawnglawng a pekmi sunparnak phun kha a si.

(John 20:26-28) 26 Cu hnu zarh khat ah khin a zultu hna cu inn chungah khan an um ṭhan i Thomas zong kha a um ve. Innka cu an hrenh dih hna, sihmanhsehlaw Jesuh cu a rung lut i an lakah khan a dir, “Nan cungah daihnak um ko seh,” tiah a ti. 27 Cun Thomas cu a thawh i, “Hika ah hin ra law ka kut hi zoh tuah hna; cun ka hnak kha ka tawng tuah. Zum loin um ti hlah, zum cang ko,” tiah a ti. 28 Thomas nih cun, “Ka Bawipa le ka Pathian,” tiah a ti.

(John 8:58) Jesuh nih cun, “Biatak kan chimh hna: Abraham hlanah ka um cang,” tiah a leh hna.

(Phil 2:6-8) 6 Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. 7 Amah lungtho te tu in cu vial cu a hlawt dih i sal sinak tu kha aa lak; Minung bantuk ah a cang i minung mui in a lang; 8 Mi toiah aa dor i nawlngaihnak lam kha thih tiangin a zulh— vailam cung thihnak kha.

(Col 1:15-16) 15 Khrih cu hmuh khawh lomi Pathian mui a si. Khrih cu Pathian fater, sermi thil vialte hna nakin a cungnung deuhmi a si. 16 Pathian nih Khrih thawng cun van le vawlei i a ummi thil vialte kha a ser hna, hmuh khawhmi thil si hna seh, hmuh khawh lomi thil si hna seh, amah thawng cun a ser hna; cun nawlngeitu thlarau hna le uknak thlarau hna le ṭhawnnak thlarau hna zong kha amah thawng cun a ser hna. Pathian nih vanle vawlei hi a dihlak in Khrih thawng cun a ser hna i Khrih caah cun a ser hna.

(John 3:16) Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.

(Rom 8:38-39) Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.

(John 10:30) Ka Pa le keimah cu pakhat kan si.

(John 10:33) Judah mi nih cun, “Lung in cheh kan in duhnak cu thil ṭha ruangah a si lo, Pathian na serhsat ruangah khan a si deuh. Nang cu minung menmen na si ko nain Pathian ah ser naa zal,” an ti.

(Heb 1:3)  Amah cu Pathian sunparnak langhtertu le a ngeihnak sunparnak hmelchunhtertu a si i thil vialte cu a thazang bia thawngin a zohkhenh. Amah nih kan sualnak cu a suah dih hnuah cunglei Pathian kut dingkamah a ṭhu.

(John 5:46) Moses kha nan zumh seh law keimah zong nan ka zumh hnga; zeicahtiah keimah kong kha amah nih a ṭial.

(Ps 23:1) Bawipa cu ka tuukhal a si; ka zaang a si lai lo.

(John 10:11) Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian.

(Matt 7:21) “Bawipa, Bawipa,” tiah keimah kha an ka au mi paoh vialte cu vancung Pennak chungah an luh kho lai lo; ka Pa vancung i a ummi duhning kha a tuahmi lawnglawng cu a luh lai.

(Act 4:12) Pathian nih mi vialte caah a pekmi min dang zeihmanh an um lo; kan khamhnak ding caah min dang zeihmanh a um lo.

(John 14:9-10) 9 Jesuh nih a leh, “Philip, zeitluk caan dah kan i pehtlai cang? Keimah kha na hmuh cang nain ka Pa kha na hngal bal lo maw? Keimah kha ka hmuhmi paoh cu ka Pa kha a hmuh ve. 10 Keimah cu ka Pa chungah ka um i ka Pa cu keimah chungah a um ti kha nan zumh lo maw? Hi bia ka chimhmi vialte hi ka Pa nih ka chungah a um i a rian a ṭuanmi a si.

(Matt 28:18) Jesuh cu an sinah a ra i, “Van le vawlei cungah uknak vialte ka sinah a pek an si cang.

(Rev 1:8) “Keimah cu Alfa le Omega, hram le cem, ‘A ummi le a rak ummi le a ra dingmi’ Thiang Pathian, Ralkapbu Bawipa nih a ti,” tiah a ti.

(Matt 28:20) “…cun zeitikhmanh caan zongah, vawlei a cem hnu tiang, keimah cu nan sinah ka um zungzal lai,” tiah a ti.

(Matt 13:17) “Biatak kan chimh hna: profet tampi le mi dingte tampi nih nan hmuhmi hi an hmuh duh hna nain an hmu lo, nan theihmi hi an theih duh hna nain an theih lo.

5. Zumnak le Zangfahnak ih Rundam kasi, Keimah tuahkhawh mi asilo.

(Eph 2:8-9) 8 Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. 9 Hi kongah hin nan i porhlawt khawhmi zeihmanh a um lo, zeicahtiah nanmah ṭuannak thawngin nan hmuhmi a si lo.

(Gal 2:16) Asinain minung hi Pathian he an i remnak cu Jesuh Khrih an zumhnak thawngin a si i Nawlbia nih tuah u a timi tuahnak thawngin a si bal lo ti kha kan hngalh. Kannih zong, Nawlbia nih tuah u, a timi tuahnak thawngin si loin Khrih kan zumhnak thawngin Pathian he remnak kan hmu lai ti caah Jesuh Khrih kha kan zumh.

(Rom 3:11-12,21-24) 11 Pathian a hngalmi ahohmanh an um lo, 12 Minung nih an dihlak in Pathian kha an pialtak i a pingah an kal dih; Ṭhatnak a tuahmi ahohmanh an um lo, pakhat hmanh an um lo.

21 Sihmanhsehlaw atu cu nawlbia he i pehtlaihnak thawngin si hleng lo tein Pathian he i pehtlaihnak lam kha kan caah a hung awng… 22 Cu lam, Pathian he i remnak lam cu Jesuh Khrih zumhnak thawngin a si i Jesuh Khrih a zummi ca paoh ah a si dih. Ahohmanh i thleidan ding a si lo, 23 zeicahtiah mi vialte cu kan sual dih cio ko i Pathian sunparnak kha kan bau dih cio ko. 24 Sihmanhsehlaw kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter.

(Col 2:16-17) 16 Cucaah cun ahohmanh nih nan ei nan dinmi thil kong ah siseh, ni thiang le Thla Thar Puai le Sabbath kong ah siseh, phung in serpiak hna hlah seh. 17 Kha bantuk thil hna kha cu hmailei thil a ra lai ding an muithlam men an rak si, a taktak cu Khrih hi a si.

(Heb 11:1) Zumhnak ngeih kan ti hi, kan i ruahchanmi kan hmuh ṭheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si.

(Rom 10:17) Cucaah zumhnak cu bia theihnak thawng khan a um i bia cu Khrih kong chimnak thawng khan a um.

(Rom 6:23) Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.

(Exo 12:23) Bawipa cu Izipt mi hna kha thah awkah Izipt ram i aa chawh tikah nan innkaba cung thi le nan innka tung cung thi kha a hmuh hna lai i cuticun hrawktu kha nanmah thah awkah nan inn chungah khan lut loin a umter lai.

(Eph 1:7) Khrih thihnak nih kannih cu a kan luatter, cucu kan sualnak kha ngaihthiam kan si tinak a si. Pathian vel cu a va lianngan hringhran dah.

(John 15:5) Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo.

6. Pathian Fa ka si. A mah muisam tlau ti lo dingin hlenh a hmang mi khawchhiapa ruahnak ka kal tak cang

(John 1:12) Asinain tlawmpal nih cun an rak cohlan i an rak zumh i cu hna cu Pathian fa cannak nawl kha a pek hna.

(1 Cor 6:3) Vancungmi khi kanmah nih an bia kan ceih hna lai ti hi nan hngal lo dahra? Hi vawlei cung kan nun lio thil chinchin cu kan ceih awk pei an si cu.

(Matt 22:30) Mithi cu nunter ṭhan an si tikah vancungmi bantuk an si lai i an i ṭhi in an i um ti lai lo.

(Ps 82:6) Nannih cu pathian nan si, Cungnung Bik fapa nan si, kan ti hna.

(1 John 3:1) Pathian nih zeitluk in dah a kan dawt hi ruat hmanh u! A kan dawtnak kha a ngan tuk caah Pathian fa tiah ti kan si — Pathian fa ti lawng hmanh si loin, a si in kan si hrimhrim. Hi ruangah hin vawlei nih a kan hngalh lonak cu a si, Pathian zong kha a hngal lo.

(Matt 8:29) Hmakhatte ah khin an ai i, “Pathian Fapa, zeidah na kan duhnak a um? A caan a tlin hlanah kannih dantat awkah na ra maw?” tiah an ti.

(Mark 16:17) A zummi pawl cu hi ṭhawnnak hmelchuhnak hi pek an si lai: ka min in khuachia an ṭhawl khawh hna lai, holh theih loin an holh lai…

(John 10:10) Mifir cu fir duh le thah duh le hrawh duh lawngah an ra. Kei cu nunnak kha an ngeih i duhdim tein an ngeih nakhnga caah ka ra.

(Matt 13:19-23) 19 Lam hril i a tlami thlaici cu Vancung Pennak kong kha a theih cu a thei i a sullam a hngal ṭung lo mi kha an si. An chung i tuhmi thlaici cu Mi Ṭhalopa nih khan a chuah dih. 20 Lung tamnak hmun i a tlami thlaici cu Vancung Pennak kha a theih cangka i lungtho ngaiin a cohlangmi kha an si. 21 Sihmanhsehlaw an chungah hram a thlak lo caah saupi an rau lo. Cu kong i harnak le hremnak an hun ton tikah an i ngol zau. 22 Hling lak i a tlami thlaici cu Vancung Pennak kong kha a theih cu a thei i sihmanhsehlaw hi vawlei cung khuasak tintuknak kong i lungretheihnak le chaw le va duhnak nih cu bia cu a thah i thei a tlai lomi hna kha an si. 23 Cun vawlei ṭhatnak hmun i a tlami thlaici cu Vancung Pennak kong kha a thei i a sullam zong a hngalmi kha an si. Thei kha an tlai i a cheu cu a let za khat in, a cheu cu a let sawm ruk in, a cheu cu a let sawm thum in an karh.

(John 6:63) Nunnak petu cu Pathian Thlarau a si; minung ṭhawnnak hi cu zeihmanh a ṭhahnem lo. Nannih kan chimhmi hna bia hi Thlarau le nunnak cu an si.

7. Pathian Bia leh Pathian Dawtnak Thisen Zumhnak thawngin a Thiang Thlarau Thuam mi ka si

(Gal 3:11) Atu cu, Nawlbia zulh thawngin ahohmanh nih Pathian he remnak an hmu kho lo ti kha a fiang; zeicahtiah Cathiang nih, “Zumhnak thawngin Pathian he aa remmi lawng an nung lai,” a ti.

(Rom 10:9) Nan kaa in, “Jesuh cu Bawipa a si,” tiah nan ti i “amah cu Pathian nih mithi hna sinin a thawhter” tiah nan lung in nan zumh ahcun, khamh nan si lai.

(1 Cor 12:3) Cucaah cun Pathian Thlarau i a hruaimi hna nih cun, “Jesuh cu chiat ko seh,” an ti kho bal lo i, Thiang Thlarau i a hruai hna dah ti lo ahcun, “Jesuh cu Bawipa a si,” an ti kho bal pek lo.

(Gal 5:22-23) 22 Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, 23 toidornak le mah le mah i tei khawhnak tehna hi an si. Cu bantuk thil hna caah cun nawlbia zeihmanh a herh lo.

(Acts 1:8) Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai.

(1 John 4:15-19) 15 Jesuh cu Pathian Fapa a si tiah a titu paoh cu, a chungah Pathian a um i Pathian chungah a ummi a si. 16 Cun kanmah hrimhrim nih Pathian nih a kan dawtnak cu kan hngalh i kan zumh. Pathian cu dawtnak a si i dawtnak chungah a ummi paoh cu Pathian chungah a um i a chungah Pathian a ummi a si. 17 Kannih kan chungah dawtnak kha tlinter a sinak cu, Biaceih Ni ah ṭihnak zeihmanh kan ngeihnak hnga lo caah a si; cun cu bantukin ṭihnak ngei loin kan um khawhnak ding cu hi vawlei cungah hin Khrih bantukin kan nun caah a si. 18 Dawtnak chungah cun ṭihnak a um lo. Dawtnak tling nih cun ṭihnak vialte kha a chuah dih hna. Cucaah ṭihnak a ngeimi cu dawtnak tling a ngei rih lo, zeicahtiah ṭihnak cu dantatnak he aa pehtlaimi a si. 19 Kannih nih Pathian kan dawt cu Pathian nih a kan dawt hmasa caah a si.

(1 Cor 6:3) Vancungmi khi kanmah nih an bia kan ceih hna lai ti hi nan hngal lo dahra? Hi vawlei cung kan nun lio thil chinchin cu kan ceih awk pei an si cu.

8. Bawipa Rundamnakah ka thang chho, Minung Thar ka si cang

(1 Pet 2:2) Ngakchia chuakka bantuk si u law thlarau hnuk kha duh u, cu thlarau hnuk nan din thawngin nan ṭhang lai i khamhnak nan hmuh lai.

(Heb 10:24-25) 24 Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih. 25 Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna seh law, kannih cu i forh chin u sih, zeicahtiah Bawipa Ni cu a nai deuh chin lengmang ti kha kan hngalh caah i forh chin lengmang ko u sih.

(Pro 3:7-8) 7 Mah mithmuh i a fimmi va si hlah; Bawipa kha ṭih law ṭhat lonak kha mertak ko. 8 Na taksa caah damnak a si lai i na ruh caah si a si lai.

(Phil 3:19-20) 19 Annih cu hell ah an tla ko lai, zeicahtiah an Pathian cu an pumsa duhnak kha an si ko i ningzah awk a simi thil kha an i porhlaw i hi vawlei cung thil lawnglawng kha an ruat. 20 Sihmanhsehlaw kannih cu vancung ram mi kan si i kan Khamhtu Bawipa Jesuh Khrih vancung in a rat lai kha ngangngan ngaiin kan hngak ko.

(Matt 24:31) Muko nganpi cu an tum lai i a vancungmi kha vawlei kil li ah a thlah hna lai i vanrang toi khuazakip in a mithim hna kha a pumh hna lai.

(Matt 27:52) thlan kha an i hung; Pathian mi a rak thi ciami tampi kha an tho ṭhan.

(Rom 12:2) Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si.

(1 Pet 4:3) Lawkihmi nih an rak tuah tawnmi kha a za ceo nan rak tuah ve ko cang. Pumsa duhnak tehna, hornak tehna, zu ritnak tehna, zu hmun i nuamhnak tehna, bawilamnak tehna le fihnung a simi siasal biaknak tehna kha nan rak tuah hna.

(2 Cor 5:17) Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.

(Gal 5:16) Thlarau nih nan nunning kha lamhruai seh law nan minung sinak duhning kha zul hlah u.

(Gal 5:22-25) 22 Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, 23 toidornak le mah le mah i tei khawhnak tehna hi an si. Cu bantuk thil hna caah cun nawlbia zeihmanh a herh lo. 24 Cun Khrih Jesuh ta a simi nih cun a minung sinak kha tuah a duh tawnmi thil le a pumsa duhnak he khan a thah. 25 Thlarau nih nunnak a kan pek cang caah kan nunnak zong hi amah nih a uk awk a si.

(James 1:19) mah hihi philh hlah u: ahohmanh bia theih duhnak leiah cun a khul a rangmi si u law biachimnak lei le thinhunnak lei ah cun a khul a nuarmi si u.

9. Thiang Thlarau Temple (IN) ka si

(Rom 12:1-2) 1 Cucaah ka u le ka nau hna, Pathian vel ruangah kan taksa vialte kha nunnak thawinak thiang le Pathian nih a lawmhmi thawinak ah pek u tiah kan forh hna. Hi bantuk nunnak cu nan biaknak a si. 2 Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si.

(Rom 8:1) Atu cu Khrih Jesuh he i pehtlai in a nungmi hna caah cun sualphawtnak a um ti lo.

(Eph 4:23-29) 23 Nan lungthin le nan ruahnak ah ser tharmi nan si awk a si. 24 Pathian he aa lo in sermi nan mihring thar kha i hruk u law cucu a dingmi le a thiangmi nunning i a langmi nunnak taktak kha a si. 25 Cucaah lihchim um ti hlah seh. Aho cio paoh nih a unau cu biatak chim seh, zeicahtiah kan dihlak in hmunkhat ah Khrih pum chung nge kan si cio. 26 Na thin a hun ahcun na thinhunnak kha sualnak chung i an luhpitu siter hlah; cun na thinhunnak cu ni tlakter hlah. 27 Khuachia cu caan ṭha pe hlah. 28 Fir a hmangmi kha fir ti hlah seh, amah ca i ding tein pawcawmnak caah le sifakmi bawmhnak caah rianṭuan seh. 29 Bia nan i ruah tikah mi ca ṭhat lonak bia hmang hlah u. Mi ca i san a tlaimi, a herhmi zawn i ṭhatnak a chuahpitu le a theimi thluachuah vanluh a petu ding bia lawng kha hmang u.

(Heb 10:26-27) 26 Biatak kha hngalhter kan si hnu i kan sual lengmang peng ko ahcun, sualnak thianhnak caah raithawinak zeihmanh a um ti lo. 27 Kan ca i a tangmi cu biaceihnak le Pathian a dohmi hna a hrawktu ding mei ṭihnung lawng kha a si ko cang.

(1 Peter 3:3-4) 3 Lenglei ṭamhnak, nan sam phiarning tehna, nan ṭhi nan hlawn tehna, nan thil nan thuam tehna ah khan nan i dawhnak cu a um awk a si lo, 4 nan i dawhnak cu nan chung muru ah a um awk a si i cu nan i dawhnak cu a tar kho lomi nemnak le daihnak lungthin, Pathian mithmuh i a sung bikmi thil a simi kha a si.

(Lev 19:28) Mithi hna ruangah nan taksa zeihmanh i at hlah u, nan pum cungah a ṭial zong i ṭial fawn hlah u: keimah cu Bawipa ka si.

(1 Cor 10:23) “Zeipaoh kan tuah khawh ko,” an ti. Asi, an tuah khawh ko, sihmanhsehlaw zeipaoh hi an ṭha dih lo. “Zeipaoh kan tuah khawh ko,” asinain zeipaoh hi kan caah an ṭhahnem dih lo.

(1 Thes 5:22) thil ṭhalo paohpaoh kha hrial hna u.

10. Tharau Raldoh dingin ka timlam

(Eph 6:11-12) 11 Khuachia hlennak kha nan doh khawh nakhnga Pathian nih an pekmi hna ralthuam vialte kha i hruk u. 12 Zeicahtiah kan dohmi hna cu minung kha si loin, vancung khua i a ummi thlarau sual ṭhawnnak hna le uktu hna le nawl ngeitu hna le hi a muimi chan lianhngannak hna hi an si.

(2 Cor 10:4) Raldohnak i kan hmanmi hriamnam cu vawlei cung hriamnam an si lo, ralhruang fekfek a hrawk khotu Pathian hriamnam tu kha an si. A hmaan loin bia i alnak kha kan hrawh.

(Luke 10:19) Ngai hmanh u: rul le tlangngaikuang hmanh lamh khawhnak ṭhawnnak le nan Ral ṭhawnnak tei khawhnak kan pek hna caah zeihmanh nih an ti kho hna lai lo.

(1 John 4:4) Sihmanhsehlaw ka fale hna, nannih cu Pathian ta nan si i nal profet kha nan tei cang hna; zeicahtiah nan chung i a ummi Thlarau kha vawlei mi a simi hna chung i a ummi thlarau nakin a ṭhawng deuh.

(Heb 12:11) Dantatnak vialte cu atu lioah cun lunglawmh awk a simi a si lo, lungretheih awk a simi a si, sihmanhsehlaw a hnuah cun dantat a tonmi hna caah daihnak thawnnak a ṭha mi thei an tlai.

(Phil 4:7) Cun Pathian daihnak, lungthin fimnak nakin a lian deuhmi daihnak cu Khrih Jesuh he nan i pehtlaihnak thawngin nan lungthin le nan ruahnak vialte kha a veng hna lai.

(2 Tim 3:2-5) 2 Minung cu amah le amah dawtu an si lai, ngun le tangka duhtu an si lai, aa porhlawtu an si lai, i porhlawtu an si lai, doh ṭawngtu an si lai, an nu le an pa daw lomi an si lai, lungsaunak ngei lomi an si lai, thianghlimnak ngei lomi an si lai, 3 dawtnak ngei lomi an si lai, mi hrem duh an si lai, mi ṭha an hmuh lo, mi hrawk duh an si lai, aa ṭha ti duh an si lai, aa dawh duh an si lai, Pathian ṭihnak ngei lomi an si lai, 4 aa ṭha ti ngai an si lai, aa porhlaw ngai an si lai, Pathian nakin vawlei thil an dawh deuh lai, 5 Pathian biaknak lungthin an ngei hrimhrim ko nain a ṭhawnnak cu an hlawt dih. Cu bantuk mi hna kha hrial hna u.

(Eph 6:17) Cun luchin caah khamhnak kha i chinh u law Thlarau nih an pekmi hna vainam caah Pathian bia kha i lak u.

(Gal 6:1) U le nau hna, ahohmanh sualnak pakhatkhat chungah an luh tikah Thlarau i a hruaimi nan si ahcun, nannih nih a sual lomi bantukin amah kha zohkhenh u. Nanmah zong sual luh khawh ti kha va ruat ve u.

(2 Tim 1:7) Pathian nih kan sinah a pekmi Thlarau cu ṭihnak petu a si lo, thazang, dawtnak le fimnak petu a si.

(Rev 21:6-8) 6 Cun Jesuh nih, “A dong cang. Keimah cu Alfa le Omega, hram le cem ka si. Tui ṭha kha a baumi kha nunnak ti kawl chungin ka pek hna lai. 7 A doh khotu paoh cu hi thil vialte kha a hmuh lai i Pathian fa ka si lai i amah cu ka fa a si lai. 8 Sihmanhsehlaw khuachia hna le zum lomi hna le a thurhnawmmi hna le mi thah duh hna le nu le pa sualnak tuah duh hna le siasal biaktu hna le fir hna le mi lihchimtu hna vialte kha an caah cu meikhu le mei a ummi rili chungah an hrawh hna lai. Cu cu thihnak pahnihnak a si,” a ti.

11. Bawipa Pathian ka Bochhan, ka Thinba lai loh

(Isa 40:31) Sihmanhsehlaw Bawipa aa bochanmi cu thazang thar an la. Mupi bangin an zuang lai; an tlik tikah an baa lai lo, an kal tik zongah an tha a di lai lo.

(1 Cor 10:13) Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazang an pek hna lai i chuah khawhnak lam zong an serpiak hna lai.

(Rom 8:28) Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh.

(Matt 18:3) “Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo.

(Matt 10:29-31) 29 Phaisa sen pakhat in pithlung pahnih nan cawk khawh, asinain khi pithlung pakhat hmanh kha nan Pa hngalh loin vawlei ah a tlong lo. 30 Nannih chinchin cu nan lu cung sam hmanh kha a rel dih. 31 Cucaah nan thinphang hlah u: nannih cu pithlung tampi nakin tampi in nan sung deuh.

(James 4:10) Bawipa hmaiah toidor tein um u law amah nih an hlorh hna lai.

12. Mobile Battery Charging bantukin, Bawipa sinah Thazang ka tawn

(Joshua 1:9) Keimah nih nawl kan pek a si lo mei? Ṭhawng ngai le ralṭha ngaiin um ko; na thinphang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko.

(Ecc 4:9-10) 9 Pahnih cu pakhat nakin an ṭhahnem deuh, zeicahtiah an ṭuanmi rian khan tam deuh an hmuh khawh. 10 Pakhat kha a tluk sual ahcun pakhat nih khan a bawmh khawh. Sihmanhsehlaw mi pakhatkhat cu amah lawng a si i a tluk sual ahcun a poi ngaingai ko amah a bawmtu ahohmanh an um ti lo.

(Gal 6:2) Pakhat le pakhat nan thilrit kha i chawng u law cuticun Khrih nawlbia kha nan zulh a si lai.

(1 Thes 5:16-19) 16 A zungzal in i lawm u, 17 a zungzal in thlacam u, 18 zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna. 19 Thiang Thlarau kha dawn hlah u.

(Eph 5:16-19) 16 Atu kan nikhua hi caan chia a si caah, caan ṭha nan hmuhmi paohpaoh kha ṭha tein hman i zuam u. 17 Mihrut si ti hlah u, Bawipa nih tuah hna seh ti an duhmi hna tu kha tuah i zuam u. 18 Zu ri hlah u, zu cu nanmah hrawktu lawnglawng a si ko, Thlarau tu khan khat deuh u. 19 Hla dawh in pakhat le pakhat i chawn u; Bawipa cu hla le aw dawh in nan lung taktak in thangṭhat u.